Мосию, Лукаонию, Фругию, Макалию, Ликию, Карию, Лудию, Масию, Трояду, Солиуду, Вифунию, Старую Фругию, и островы пакы имать: Сарданию, Крит, Купръ, и реку Гиону, зовемую Нил.
Афетови же полунощная страна и западная: Мидия, Олваниа, Арменьа Малая и Велелика (А — великая), Кападокия, Фефлагони, Галатия, Кольхисъ, Въспории, Меоти, Дереви, Сармати, Тавриани, Скуфиа, и Фраци, Макидониа, Далматия, Малоси, Феласия, Локриа, Пелениа, яж(е) и Пелопонис наречется, Аркадиа, Ипирониа, Илурикъ, Словене, Лухотьа, Андриакиа, Андрьатинска пучина. Имат же и островы: Вританию, Сикелию, Евию, Родона, Хиона, Лезвона, Куфирана, Закунфа, Кефалиния, Ифакину, Керкуру, и часть всякоа страны, и нарицаему Онию, и реку Тиугру, текущую межы Миды и Вавилоном; до Понтьскаг(о) моря, на полунощныа страны, Дунай, Днъпръ, и Кавкасийскиа горы, рекше Угоръскыа, и отуда даж(е) и до Днъпра, и прочаа рекы: Десна, Припять, Двина, Волховъ, Волга, иже идеть на всток в час(ть) Симову. Въ Афетовъ же части седит русь, и чюд(ь), и вси языци: меря, мурома, вес(ь), мордва, заволоцкая чюд(ь), пермь, печера, ямь, литва, зимъгова (А — зимъгола), корсь, сътгола, либь, Ляхове ж(е) и пруси и чюд(ь) приседят к морю Варяжскому. По сему же морю приселять варязи семо ко въстоку придъла Симова, по тому же морю седят к западу до земли Агаянскы, до Воложскы. Афетово бо колено то: варязи, всеи (А — свеи), урамане, галичанъ, нъмци,