В лът(о) 6411. Игореви же възрастъшю и хожаше по Олзъ и слушаша ег(о), и приведоша ему жену от Пьскова, именемь Олену (А — Олгу).
В лът(о) 6412.
В лът(о) 6413.
В лът(о) 6414.
В лът(о) 6415. Иде Олегъ на Грекы. Игоря остави в Киевъ, поя множество варяг, и словенъ, и чюд(и), и словене, и кривичи, и мерю, и деревляны, и радимичи, и поляны, и съверо, и вятич(и), и хорваты, и дулъбы, и тиверци, яже сут(ь) толковины: си вси звахутьс(я) от грекъ Великая Скуф(ь). Съ сими со всъми поиде Олегъ на конех и на кораблех, и бъ числомъ кораблей 2000. Прииде къ Ц(а)рюграду; и греци замкоша Суд, а град затвориша.



И выиде Олегъ на брегъ, и воевати нача, и много убийства сотвори около град(а) грекомъ, и разбита многы полаты, и пожгоша ц(е)ркви, а ихже имаху плънникы, овъхъ посекаху, другиа же мучаху, иныя же растреляху, а другыя в море вметаху. И ина многа творяху русь грекомъ, елико же ратнии творять.