Асколдъ же и Диръ приидоста, и выскакавше вси прочии из лодьа, и реч(е) Олегъ Асколду и Дирови: "Вы нъста кн(я)зя, ни рода кн(я)жа", и вынесоша Игоря: "А се ес(ть) с(ы)нъ Рюриковъ". И уби (А — убиша) Асколда и Дира.



И несоша на гору и погребоша, еже нынъ зовется Угорьское, идъже нынъ Олъминъ дворъ; на той могиле поставилъ ц(е)рк(о)вь с(вя)т(а)го Николу. А Дирова могыла за с(вя)тою Ориною. И съде Олегъ кн(я)жа в Киевъ, и реч(е) Олегъ: "Се буди м(а)ти градом рускимъ". И бъша у него варязи, и словене, и прочии, прозвашася русью. Сей же Олегъ нача городы ставити, и устави дани словеном, и кривичем, и мерямъ, и устави варягом дань даати от Новагорода гривенъ 300 на лът(о), мира дъля, еже и до см(е)рти Ярославле дааша